1 नोव्हेंबरपासून पारदर्शक आणि ग्राहकोपयोगी सुविधा नव्या स्वरुपात

 

 देशभरात १ नोव्हेंबरपासून अनेक महत्त्वाचे नियम बदलले आहेत. बँकिंग क्षेत्रातील कारभार अधिक पारदर्शक करण्यासाठी आणि ग्राहकांना चांगल्या सुविधा उपलब्ध करुन देण्यासाठी बँकिंग अधिनियमांत बदल करण्यात आले आहेत. बँकिंग कायदे दुरुस्ती अधिनियम २०२५ लागू होत आहे.
याचा थेट परिणाम सामान्य लोकांच्या खिशावर आणि दैनंदिन जीवनावर होईल. यामध्ये आधार कार्ड, बँकिंग प्रणाली, गॅस सिलेंडर आणि म्युच्युअल फंडाशी संबंधित नियमांचा समावेश आहे.

बँक खाते आणि लॉकर नामांकन नियमांमध्ये बदल

बँकिंग प्रणालीमध्येही १ नोव्हेंबरपासून एक मोठा बदल झाला आहे. ग्राहकांना आता त्यांच्या बँक खात्यांसाठी, लॉकर्ससाठी आणि सुरक्षित कस्टडीसाठी फक्त एकच नाही तर चार नामांकित व्यक्ती नियुक्त करता येतील. हा बदल बँकिंग कायदा (सुधारणा) कायदा २०२५ अंतर्गत लागू केला जात आहे. ग्राहकांना प्रत्येक नामांकित व्यक्तीला किती रक्कम मिळेल हे देखील ठरवता येईल. पहिल्या नामांकित व्यक्तीचा मृत्यू झाला तर त्यांचा हिस्सा आपोआप दुसऱ्या नामांकित व्यक्तीकडे हस्तांतरित होईल. यामुळे भविष्यातील वादांची शक्यता कमी होईल आणि प्रक्रिया पारदर्शक होईल. ठेवीदार अनेक नॉमिनी किंवा अनुक्रमे नॉमिनी ठेवू शकतात.

आधार कार्ड अपडेट करायचयं ? नियम सोपे झालेत...

UIDAI ने आधार कार्ड अपडेट प्रक्रिया सोपी केली आहे. आता तुम्हाला तुमचे नाव, पत्ता, जन्मतारीख किंवा मोबाईल नंबर यासारखी माहिती अपडेट करण्यासाठी आधार केंद्राला भेट देण्याची आवश्यकता नाही. तुम्ही हे सर्व ऑनलाइन करू शकता. केंद्राला भेट देणे फक्त फिंगरप्रिंट किंवा आयरिस स्कॅन सारख्या बायोमेट्रिक तपशीलांसाठी आवश्यक असेल. नवीन प्रणालीअंतर्गत, UIDAI पॅन, पासपोर्ट, रेशन कार्ड, मनरेगा आणि शाळेच्या नोंदी यासारख्या सरकारी डेटाबेस विरुद्ध तुमची माहिती स्वयंचलितपणे सत्यापित (Authenticate) करेल. याचा अर्थ कागदपत्रे अपलोड करण्याचा त्रास दूर होईल.

म्युच्युअल फंड गुंतवणूकदारांसाठी नवीन नियम

पारदर्शकता वाढवण्यासाठी ‘सेबी’ने म्युच्युअल फंड गुंतवणुकीशी संबंधित नवीन नियम लागू केले आहेत. आता एखाद्या मालमत्ता व्यवस्थापन कंपनी (AMC) चा अधिकारी, कर्मचारी किंवा कुटुंबातील सदस्य १५ लाखांपेक्षा जास्त व्यवहार करतो. तर कंपनीला ही माहिती त्यांच्या वरिष्ठ अधिकाऱ्यांना द्यावी लागेल.
या सर्व तरतुदी सर्वसामान्यांच्या बँकिंग सुविधा सोप्या आणि पारदर्शक करण्याच्या उद्देशाने तयार केल्या आहेत.